ലോകത്തിലെ ഏറ്റവും വേഗം വളരുന്ന വലിയ സമ്പദ്‌വ്യവസ്ഥ എന്ന പട്ടം ഒരിക്കൽക്കൂടി ഇന്ത്യ നിലനിർത്തി. റിസർവ് ബാങ്ക് ഉൾപ്പെടെയുള്ള സ്ഥാപനങ്ങളുടെ എല്ലാ പ്രവചനങ്ങളെയും നിഷ്പ്രഭമാക്കിക്കൊണ്ട്, നടപ്പുവർഷത്തെ (2025-26) രണ്ടാംപാദമായ ജൂലൈ-സെപ്റ്റംബറിൽ ഇന്ത്യയുടെ ജിഡിപി വളർച്ച 8.2 ശതമാനത്തിൽ എത്തി. കേന്ദ്ര സ്റ്റാറ്റിസ്റ്റിക്സ് മന്ത്രാലയം പുറത്തുവിട്ട റിപ്പോർട്ട് പ്രകാരം, കഴിഞ്ഞ ആറ് ത്രൈമാസങ്ങൾക്കിടയിലെ ഏറ്റവും ഉയർന്ന വളർച്ചാ നിരക്കാണിത്. ഈ രംഗത്തെ പ്രധാന എതിരാളിയായ ചൈനയുടെ ജിഡിപി വളർച്ച 4.8% മാത്രം. യുഎസ് ഔദ്യോഗികമായി കണക്ക് പുറത്തുവിട്ടിട്ടില്ല. എങ്കിലും പ്രതീക്ഷിക്കുന്ന വളർച്ച 4 ശതമാനത്തിനടുത്ത്. ജപ്പാൻ നെഗറ്റീവ് 0.4%, ജർമനി പൂജ്യം ശതമാനം, യുകെ 0.1% എന്നിങ്ങനെയുമാണ് വളർന്നത്.
അമേരിക്കൻ പ്രസിഡൻ്റ് ഡോണൾഡ് ട്രംപ് ഇന്ത്യയ്ക്കുമേൽ അടിച്ചേൽപ്പിച്ച 50% ഇറക്കുമതി തീരുവയുടെ പശ്ചാത്തലത്തിൽ ആണ് ഈ മുന്നേറ്റം എന്നത് ഇരട്ടി മധുരമായി. ജിഎസ്ടി പരിഷ്കാരം പൂർണ്ണമായി ഗുണം ചെയ്തുതുടങ്ങും മുൻപേ ഇത്രയും മികച്ച വളർച്ച നേടാനായത് രാജ്യത്തിന് വലിയ ആശ്വാസമാണ്. കഴിഞ്ഞ പാദത്തിൽ (ജൂലൈ-സെപ്റ്റംബർ) ഇന്ത്യയുടെ ജിഡിപി മൂല്യം 48.63 ലക്ഷം കോടി രൂപയാണ്. മുൻവർഷത്തെ 44.94 ലക്ഷം കോടി രൂപയിൽ നിന്നാണ് 8.2% വളർച്ച രേഖപ്പെടുത്തിയത്. ഒന്നും (7.8%), രണ്ടും (8.2%) പാദങ്ങളിലെ ജിഡിപി വളർച്ചാനിരക്കുകൾ പ്രതീക്ഷകളെ കവച്ചുവച്ച് മുന്നേറിയതിനാൽ, ഈ സാമ്പത്തിക വർഷവും (2025-26) ഇന്ത്യ 7 ശതമാനത്തിനു മുകളിൽ ജിഡിപി വളർച്ച രേഖപ്പെടുത്താനാണ് സാധ്യത.
ഇന്ത്യൻ സമ്പദ്‌വ്യവസ്ഥയുടെ ഈ കുതിപ്പിന് പ്രധാന കാരണം മാനുഫാക്ചറിങ് മേഖലയുടെ വൻ തിരിച്ചുവരവാണ്. മാനുഫാക്ചറിങ് മേഖലയിലെ 9.1% വളർച്ച, വ്യവസായ മേഖലയ്ക്ക് ലഭിച്ച വലിയ ഉണർവാണ് സൂചിപ്പിക്കുന്നത്. ധനകാര്യം, റിയൽ എസ്റ്റേറ്റ് തുടങ്ങിയ മേഖലകളും 10.2% വളർച്ചയോടെ ഈ നേട്ടത്തിന് കരുത്തുപകർന്നു. അതേസമയം, കാർഷിക, നിർമ്മാണ മേഖലകളിലെ വളർച്ചാ നിരക്ക് നേരിയ തോതിൽ കുറയുകയാണുണ്ടായത്. വൈദ്യുതി, ഗ്യാസ്, ജലവിതരണം തുടങ്ങിയ യൂട്ടിലിറ്റി മേഖലയുടെ വളർച്ച 3-ൽ നിന്നുയർന്ന് 4.4 ശതമാനമായി. വ്യാപാരം, ഹോട്ടൽ, ഗതാഗതം, കമ്യൂണിക്കേഷൻ, ബ്രോഡ്‌കാസ്‌റ്റിങ് തുടങ്ങിയ വിഭാഗങ്ങൾ ഉൾപ്പെടുന്ന മേഖലയുടെ വളർച്ചനിരക്ക് 6.1ൽ നിന്ന് 7.4 ശതമാനത്തിലെത്തി.
“2025/26 സാമ്പത്തിക വർഷത്തിലെ രണ്ടാം പാദത്തിലെ 8.2 ശതമാനം ജിഡിപി വളർച്ച വളരെ മികച്ചതാണ്. വളർച്ചയെ അനുകൂലിക്കുന്ന നയസമീപനങ്ങളുടെയും പരിഷ്കാരങ്ങളുടെയും സ്വാധീന ഫലമാണ്,” എന്നും പ്രധാനമന്ത്രി നരേന്ദ്ര മോദി എക്‌സിൽ കുറിച്ചു. പരിഷ്കരണങ്ങൾ മുന്നോട്ട് കൊണ്ടുപോകുന്നത് സർക്കാർ തുടരുമെന്നും അദ്ദേഹം കൂട്ടിച്ചേർത്തു. ആഗോള അനിശ്ചിതത്വങ്ങൾ നിലനിൽക്കുമ്പോഴും ആഭ്യന്തര സമ്പദ്‌വ്യവസ്ഥയെ ശക്തിപ്പെടുത്തുന്നതിനായി, കഴിഞ്ഞ മൂന്ന് മാസത്തിനിടെ സർക്കാർ നൂറുകണക്കിന് ഉൽപ്പന്നങ്ങളുടെ ജിഎസ്ടി കുറയ്ക്കുകയും ഏറെക്കാലമായി വൈകിയ തൊഴിൽ പരിഷ്കാരങ്ങൾ നടപ്പിലാക്കുകയും ചെയ്തിരുന്നു.
ഈ വർഷം മുഴുവനുള്ള വളർച്ച 7 ശതമാനമോ അല്ലെങ്കിൽ അതിലും കൂടുതലോ ആയിരിക്കുമെന്ന് ഇപ്പോൾ നമുക്ക് ആത്മവിശ്വാസത്തോടെ പറയാൻ കഴിയും എന്ന് കണക്കുകൾ പുറത്തുവന്നതിന് ശേഷം നടന്ന വാര്‍ത്താ സമ്മേളനത്തിൽ സർക്കാരിൻ്റെ മുഖ്യ സാമ്പത്തിക ഉപദേഷ്ടാവ് വി അനന്ത നാഗേശ്വരൻ പറഞ്ഞു. നേരത്തെ 6.3 ശതമാനം മുതൽ 6.8 ശതമാനം വരെ വളർച്ചയാണ് അദ്ദേഹം പ്രവചിച്ചിരുന്നത്. യുഎസുമായി ഉഭയകക്ഷി വ്യാപാരക്കരാർ ഉടൻ യാഥാർഥ്യമായേക്കുമെന്ന വിലയിരുത്തലും അതോടൊപ്പം റഷ്യയുമായുള്ള ബന്ധം ശക്തമായി തുടരുന്നതും ഇന്ത്യൻ സമ്പദ്‍വ്യവസ്ഥയ്ക്ക് നേട്ടമാകും.
